Muhammad Muhammad, DAGA DAMATURU
CUTAR koda cuta ce dake da matukar hatsari ga Bil-Adama, kuma a zancen
da ake yi a yanzu wannan cuta ta koda rahotannin masana na nuna kan
cewar Jihar Yobe ce ke kan gaba a dukan fadin tarayyar kasar nan da ke
da yawan jama\’ar da ke dauke da wannan cuta ta koda, a kan hakan ne
GTK ta samu tattaunawa da Kwamishinan ma\’aikatar lafiya a Jahar Yobe Dokta Muhammad Bello Kawuwa inda ya gaskata wannan rohoton da masana da ke cibiyar kiwon lafiya ta gwamnatin tarayya (FMC) da ke garin Nguru a jihar suka bayar a kwanakin baya kan cewar, Jihar Yobe ce ke kan gaba a dukan fadin kasar nan da yawan
mutane da ke dauke da cutar koda (kidney) tare da kawo irin matakan da
suke shirin dauka don magance ta. Ga yadda tattaunawar ta kasance:-
Tambaya :- Yallabai, me za ka ce dangane da wani rahoto da wasu masana
kan harkokin kiwom lafiya cibiyar kiwon lafiya ta gwamnatin tarayya
(FMC) da ke Nguru suka bayar kan cewar, jihar ne ke kan gaba a yawan
mutanen da ke dauke da cutar koda (kidney) a dukan kasar nan?
Dokta:- Alal hakika wannan rahoto da ya fito daga masana a asibitin
Nguru dangane da wannan cuta ta koda tabbas haka ne domin a
halin da ake ciki wannan cuta ta koda cuta ce dake shirin zama
alakakai ga al\’umma kasanc ewar a kullum bazuwa take yi kamar wutar
daji ta inda ake samun yawaitar masu kamuwa da ita.
Tambaya:- Wadanne bangarorin jihar ne ake samun yawaitar masu dauke da
wannan cuta ta koda?
Dokta .:- Bangaren jihar da aka fi samun yawaitar masu kamuwa da wannan
cuta dai shi ne bangaren arewacin Jihar ta Yobe wanda shi ne aka
fi samun yawaitar masu kamuwa da wannan cuta ta koda babu kakkautawa
musamman ma a kananan hukumomin Geidam, Bade, Jakusko, Yusufari,
Karasuwa, Nguru da Machina.
Tambaya:- Daga lokacin da kuka samun wannan rahoto ya zuwa yanzu ko
akwai wani hobbasa da kuka yi dangane da hakan?
Dokta ;- A hakikannin gaskiya tun ma kafin wannan rahoto gwamnatin
Jihar Yobe ta farga ce war, lalle wannan matsala ta cutar koda ta kunno
kai a jihar sai aka fara daukar mataki, to amma kuma fitowar wannan
rahoto na masana mai nuna Jihar Yobe ne ke kan gaba a
masu dauke da wannan cuta sai hakan ya sa muka shiga bincike ba dare
ba rana don gano masu dauke da wannan cuta don kai musu daukin gaggawa
ganin cewar jinya ce da ke da tsadar dawainiyarta da kuma hanyoyin da
za a bi don shawo kanta to alhamdulillah.
Tambaya:- Kamar yaya?
Dokta:- Domin a halin da ake ciki gwamnatin jihar ta yunkura ta wajen
gano masu dauke da wannan cuta tun tunin tare da daukar dawainiyar
wasu daga cikinsu da cutar tafi tsamari inda ake kai su kasashen
ketare don yi musu magani yayin da wadanda kuma cutar bata yi tsamari
ba ake daukar dawainiyar wanke musu odar da yi musu magani a cibiyar
kiwon lafiya FMC da ke Nguru ko wasu asibitocin dabam.
Bayan haka kuma Gwamna Alhaji Ibrahim Geidam ya ba da umarnin
kafa kwakkwaran kwamitin masana kan harkokin kiwon lafiya da zai fara
aiki a sabuwar shekara mai kamawa ta 2016 In Allah ya so don gano
abubuwan da ke haifar da yawaitar kamuwa da wannan cuta da kuma
binciken irin ruwan da suke sha da gwada kasar yankunan da abin ya fi
kamari da sauran dabaru don taka wa lamarin birki.
Ya kara da cewar dama babban abin da ya ke damunsu shi ne rashin sanin
mene ne babban abin da ke kawo wannan ciwo na koda a arewacin Yobe to
shi ya sa gwamnatin ta kafa wannan kwamitin don auna masu dauke da
cutar da kuma su kan su masu lafiyar in Allah ya so matukar an kammala
binciken aka kuma gano bakin zare to kuwa cutar ta koda za ta zama
tarihi a jihar domin kuwa ba za mu dauki abin da wasa ba.
Tambaya:- Yallabai me zai hana gwamnatin Yobe ta samar da wata
cibiya ta musamman don kula da masu dauke da wannan cuta ta koda?
Dokta:- A yanzu haka da nake magana cibiyar kiwon lafiya ta gwamnatin
tarayya (FMC) da ke Nguru na da wata cibiya ta musamman da
ke kula da masu dauke da cutar wadda gwamnatin Yobe da hannun ta cikin
kafuwar wannan cibiya ta Nguru don haka ashe ka ga muna da cibiya da
ke kula da wannan cuta ta koda, kuma a nan Damaturu ma idan Allah ya so za
mu yi kokarin samar da sashin da zai kula da masu dauke da wannan cuta
a babban asibitin tunawa da marigayi Sani Abacha da ke Damaturu.
Tambaya:- Ko gwammatin Yobe ta nemi wasu kungiyoyin ba da tallafi kan
harkokin kiwon lafiya na kasa da kasa da na cikin gida dangane da
wannan cuta?
Dokta :- A gaskiya ba mu yi haka ba amma kuma shi taimako babu
wanda ba ya so, don haka matukar in mun samu wani wanda ke sha\’awar
taimaka wa bangaren ciwon oda ya nuna son taimakawa muna maraba da su.
