Muhammad Sani Chinade, Daga Damaturu
HARIN da wasu \’yan bindigar da ake kyautata zaton \’yan kungiyar Boko
Haram ne su ka kai a makarantar sakandaren \’yan mata ta kimiyya da
fasaha da ke garin Dapchi cikin karamar hukumar Bursari a Jihar Yobe
da ya yi sanadiyyar yin awon gaba da dalibai mata akalla 110 ya jawo
cece-ku-ce a tsakanin Gwamnan Jihar Yobe Alhaji Ibrahim Gaidam da kuma
bangaren tsaron kasa.
A rahoton da wakilinmu ya ruwaito na nuna cewar, wannan takaddama
tsakanin Gwamna Gaidam da kuma bangaron dakarun kasa ya taso ne
sakamakon bayanin da Gwamnan ya yi lokacin da shugaban kungiyar
Gwamnonin arewa Alhaji Kashim Shettima na Jihar Borno ya kai masa
ziyarar jaje a madadin kungiyarsu cewar, ko daya biyu babu wannan hari
da aka kai a makarantar \’yan mata ya faru ne sakamakon janye jami\’an
tsaron sojan da ke garuruwan Dapchi da Baimari kasa da sati biyu.
Gwamna Ibrahim ya ci gaba da cewar, in da har sojoji na garin na
Dapchi ba a janye su ba tabbatacce ne wadannan maharan da ba za su
gwada kawo wannan hari ba tare kuma da samun nasarar tserewa da
dalibai mata akalla 110 kamar yadda sahihan alkaluma suka nuna.
Ya kara da cewar, ire-iren hakan ya sha faruwa a Jihar ta Yobe, a
cewar gwamnan a shekarar 2014 hakan ya faru a garin Buni Yadi yadda
kasa da kwanaki 2 da janye sojoji a gab da makarantar sakandare
gwamnatin tarayya (FGC) sai ga \’yan Bokn sun kai harin da ya yi
sanadiyar kashe dalibai sama da 20. Haka aka yi a makarantar koyon
aikin gona dake Gujba wadda aka yanka tare da kona dalibai masu yawan
gaske.
Don haka gwamnan ya kirayi bangaren na tsaro da su gaggauta dawo da
jami\’an tsaro a wuraren da aka janyesu musamman agaruruwan da ake
zaton suna fuskantar barazanar tabarbarewar harkokin tsaro da kuma
garuruwan dake da makarantun sakandare na mata ko na maza.
Idan ba a manta ba a ranar litinin ta mako jiya ne dai \’yan bindigar da
ake kyautata zaton \’yan kungiyar Boko Haram ne suka yi awon gaba da
daliban makarantar sakandaren \’yan mata na garin Dapchi wadda hakan ya
jefa al\’umma cikin dimuwa da tunanin lamarin ya zama tamfar wata
boyayyar manufa kasancewar wadannan \’yan kungiya babu abin da suka
dauka in banda wadannan \’yan mata kamar yadda mafi yawa-yawan
al\’ummomi ke cewa.
Malam Bashir Dapchi wadda na daga cikin iyayen da lamarin ya shafa
kuma shugaban kungiyar wadanda aka dauke \’ya\’yansu shi ma ya yi irin
wannan korafi da gwamna Gaidam ya yi. A cikin jawabinsa ga wakilinmu
ya ce lalle dauke yaransu ba komai bane illa sakacin harkokin tsaro,
don da akwai sojoji a lokacin lalle da wadannan mahara ba su samu
nasarar dumfarar makarantar ba ma ballantana su dauke yaran.
Don haka ya yi roko ga gwamnatin tarayya da ta yi hobbasan kwato musu
yaransu a cikin lokaci tun kafin lamarin ya yi zurfi irin na \’yan matan Chibok.
